СЛУЖБА
святому праведному воину
Феодору Ушакову
На Малой вечерни.
На Господи, воззвах: стихиры, глас 1.
Подобен: Всехвальнии мученицы:
От благочестиваго корене святолепная розга произшед,* плод произнесе любве и правды,* премирно благоухая верно от души чтущыя тя,* о нихже со Ангелы Христу молися, Феодоре,** даровати мир и велию милость.
Преславное твое житие* и подвизи велии, иже на мори,* всюду предивна тя показаша,* праведников благолепие, воевод похвало:* и, яко солнце, на земли лучи распростер, озарил еси верных сердца,* совершающих божественную твою память,** всехвальне Феодоре.
Благочестием и верою светло украшен,* яко мужествен воин, и преизряден, и преименит,* православнаго Отечества поборник был еси:* от негоже ныне ублажаемь,** моли даровати нам мир и велию милость.
Тирона и Стратилата храбрости подражая,* изволил еси братися за люди Божии,* темже и на злочестивых агарян нашед,* невредимь пребыл еси,* славу Отечеству твоему принося.* Ныне убо со святыми пребывая,** мирное житие у Господа испроси наследию твоему.
Слава, глас тойже:
Приидите, вернии, в честную обитель Санаксарскую,* велицыи и малии,* восхвалим теплаго предстателя и ходатая,* Христова воина и молитвенника,** праведнаго Феодора.
И ныне, Богородичен, глас тойже:
Радуйся, Богородице Дево,* радуйся, Похвало всея вселенныя,* радуйся, Пречистая Мати Божия, Благословенная.
На стиховне стихиры, глас 2.
Подобен: Доме Евфрафов:
Дом добродетелей Святаго Духа* поспешением благодати* Феодор явися:* темже ныне сошедшеся,** тому воспоим.
Стих: Возвеселится праведник о Господе* и уповает на Него.
Радуйся, воевод русских похвало* и воинов соблюдение,* варваров побеждение,* сирот и вдов заступниче** и страны нашея утверждение.
Стих: Блажен муж, бояйся Господа,* в заповедех Его восхощет зело.
Приими ныне пение* последователей твоих, о воине,* и молящим ти ся у Христа испроси* на сопостаты одоление,** да ублажаем тя присно.
Слава, глас тойже:
Пристанище тя небурное* и стену необоримую* стяжахом, вернии,* яко флотоводца изрядна** и военачальника предивна, Феодоре.
И ныне, Богородичен, глас тойже:
Тайно воспеваем Тя,* Мати Божия,* гласы православными,* яко Церковь блюдома есть** молитвами Твоими.
Тропарь, глас 1:
Державе Российстей архистратиг непобедимый явился еси,* агарянскую злобу нивочтоже вменив и разорив:* ни славы мирския, ниже богатства взыскуя,* но Богу и ближнему послужил еси.* Моли, святе Феодоре,* воинству нашему даровати на враги одоление,* Отечеству во благочестии непоколебиму пребыти** и сыновом Российским спастися.
Слава, и ныне, Богородичен, глас тойже.
На Велицей вечерни.
Блажен муж: 1-й антифон.
На Господи, воззвах: стихиры на 8, глас 2.
Подобен: Киими:
Киими похвальными венцы* венчаим праведнаго Феодора;* людей благоверных защитника и воевод православных похвалу,* дивнаго в подвизех, безплотных сожителя,* источника Божественных дарований неисчерпаемаго,* егоже ради Христос земли Российстей** дарует мир и велию милость.
Киими похвальными венцы* увязем праведнаго Феодора;* градов мудраго здателя и управителя,* храмов Божиих светлаго украсителя,* врача премудраго и богоприятна,* исцеляюща недуги и болезни наша,* егоже ради врагов шатания Христос низложи,** имеяй велию милость.
Киими смиренными устнами* воспоем Феодора премудраго;* солнца светлейша молитвенника,* печальных утешение и порабощенных свободителя,* похвалу народов православных,* реку милости и больных врача безмездна,* душу свою за други полагающа о Христе,** подающаго нам велию милость.
Киими духовными песньми* воспоем преславнаго воина;* архистратига искуснаго и непобедимаго,* врагом безбожным страшнаго,* правды правило, веселие земли Российския,* крепость Отечества нашего и забрало,* сирот питателя, обидимых заступника,* столпа пресветлаго, просвещающаго нас благодатей светлостьми** и подающа велию милость.
Слава, самогласен, глас 4:
Людие и князи,* вкупе богатии и убозии, радуйтеся,* светлое днесь торжество празднующе непобедимаго воеводы,* праведнаго Феодора:* воспевайте убо, правовернии воини и простии людие,* общаго предстателя и помощника,** и молебника о душах наших.
И ныне, Богородичен, глас тойже: Иже Тебе ради:
Вход. Прокимен дне. И чтения три.
Премудрости Соломоновы чтение (глава 3):
Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их, и еже от нас шествие, сокрушение; они же суть в мире. Ибо пред лицем человеческим, аще и муку приимут, упование их безсмертия исполнено. И в мале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их, и яко всеплодие жертвенное, прият я. И во время посещения их возсияют и, яко искры по стеблию, потекут. Судят языком и обладают людьми, и воцарится Господь в них во веки. Надеющиися Нань разумеют истину и вернии в любви пребудут Ему. Яко благодать и милость в преподобных Его и посещение во избранных Его.
Премудрости Соломоновы чтение
(глава 5 и 6):
Праведницы во веки живут, и в Господе мзда их, и попечение их у Вышняго. Сего ради приимут Царствие благолепия и венец доброты от руки Господни, зане десницею покрыет я и мышцею защитит их. Приимет всеоружие рвение свое и вооружит тварь в месть врагом. Облечется в броня правды и возложит шлем суд нелицемерен. Приимет щит непобедимый, преподобие, поострит же напрасный гнев во оружие, споборет же с ним мир на безумныя. Пойдут праволучныя стрелы молниины, и, яко от благокругла лука облаков, на намерение полетят. И от каменометныя ярости исполнь, падут грады, вознегодует на них вода морская, реки же потопят я нагло. Сопротив станет им дух силы и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли. Внушите, держащии множества и гордящиися о народех язык, яко дана есть от Господа держава вам и сила от Вышняго.
Премудрости Соломоновы чтение
(глава 4):
Праведник, аще постигнет скончатися, в покои будет. Старость бо честна не многолетна, ниже в числе лет изсчитается. Седина же есть мудрость человеком, и возраст старости житие нескверное. Благоугоден Богови быв, возлюблен бысть и живый посреде грешник преставлен бысть. Восхищен бысть, да не злоба изменит разума его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга, угодна бо бе Господеви душа его. Сего ради потщася от среды лукавствия. Людие же видевше и не разумевше, ниже положше в помышлении таковое, яко благодать и милость в преподобных Его и посещение во избранных Его.
На Литии стихиры святаго, глас 5:
Посрамил еси диавола и слуг его,* благоверне воине Феодоре,* богоугодным своим житием и ратными подвиги,* Царство Небесное в себе стяжав,* и славу Отечеству доставил еси.* Ныне молися Христу Богу нашему** о спасении душ наших. О христоноснии народи,* возопием любовию к дивному заступнику нашему.* О благоверне и всечестне Феодоре,* непрестанно воздвигни руце к Богу,* и молися за святители, монахи и за вся люди,* избавити грады и вся страны Российския* от нашествия иноплеменник и междоусобныя брани* и даровати воинству нашему на враги победы и одоление,* и церквам благостояние мирно устрой,** и моли о душах наших.
Глас тойже:
Яко корабль непотопляемь,* тя, Феодоре, обретаем заступника в бедах:* в мори плавающии и на земли пребывающии,* сущии далече и близ обретающиися.* Темже сошедшеся вопием: молися ко Господу,** яко да всякаго избавимся обстояния.
Слава, глас 1:
Радуйся и веселися о Господе, обитель Санаксарская,* светло торжествуй и ликуй Христова Церковь,* со священноиноки и иноки,* имущи честное сокровище, святыя мощи* преславнаго заступника, праведнаго Феодора.* Приидите, вернии, тецыте, собравшеся,* и ликующе сице рцыте:* радуйся, святче Феодоре,* Отечеству нашему и обители сей утверждение** и нам, верным, спасение.
И ныне, Богородичен, глас тойже.
На стиховне стихиры, глас 8. Подобен:
О, преславнаго чудесе:
Праведне богомудре Феодоре,* чистая твоя душа,* правоверным смыслом сияющи,* облистает добродетелей светлостию* и озаряет верных исполнение,* бесов тьму отгоняющи.* Темже, яко причастника невечерния благодати,** тя благочестно вси почитаем, досточудне.
Стих: Праведник, яко финикс, процветет,* и яко кедр, иже в Ливане, умножится.
Имея душу милостиву* и чист помысл, и сердце бодрое,* веру неблазненную,* и любовь воистину нелицемерную,* от земли преставился еси к Небесным* и с лики праведных водворяешися.* Темже чтем тя священными песньми* и благочестно вси ублажаем,** святче Феодоре.
Стих: Возвеселится праведник о Господе* и уповает на Него.
О, преславнаго чудесе!* Непреборимый воин,* небесным стратигом подобен,* нам является днесь.* Удивляются вси концы земнии,* ужасаются варварстии полцы.* О, каковый споборник нам даровася!* Имже, Христе, спаси души наша,** яко Един благоутробен.
Слава, глас тойже:
Богомудре Феодоре, великий воине,* блажен еси, яко блаженство Небесное наследовал еси,* егоже ради милосердия плоды творя,* нищия и болящия удовлил еси,* сирот питатель, пленных свободитель быв.* Тем в непрестаемую радость вшел еси Господа твоего,* Емуже со Ангелы предстоя,* моли верою поющим тя** изобилие щедрот подати и грехов оставление.
И ныне, Богородичен, глас тойже: Безневестная Дево:
Тропарь, глас 1:
Державе Российстей архистратиг непобедимый явился еси,* агарянскую злобу нивочтоже вменив и разорив:* ни славы мирския, ниже богатства взыскуя,* но Богу и ближнему послужил еси.* Моли, святе Феодоре,* воинству нашему даровати на враги одоление,* Отечеству во благочестии непоколебиму пребыти** и сыновом Российским спастися.
На Утрени.
На Бог Господь: тропарь святаго дважды.
Слава, и ныне, Богородичен.
По 1-м стихословии седален, глас 1:
Житейское море со многими подвиги и труды преплыв, и в пристанище мысленное покоя пристал еси: сосуд благочестия явлься, блаженне воине Феодоре, требующыя милости обогащай, Христа Бога моля даровати нам велию милость.
Слава, и ныне, Богородичен:
Пажить древнюю потреби человекоубийственную утроба Девича, Христа рождши: темже вся тварь радуется ныне, Пречистая, яко оживльшися, и согласно воспевает Твоего Сына и Бога.
По 2-м стихословии седален, глас 2:
Огня свирепство видимых врагов и невидимых, восстающих на наследие твое, богоприятных твоих молитв, Феодоре победоносче, залей водами, да спасшеся от них, прославим Бога, дивнаго в чудесех.
Слава, и ныне, Богородичен:
Смири, Владычице, врагов вознесенную выю велеречующих, советы и злонравия и сердца поучающихся злым на ны по вся дни: крепость же и победу подаждь призывающым Тя, Мати Божия, радость скорую подающи.
По полиелеи седален, глас 8:
Радуйся, Российская похвало: радуйся, Церкве Божия украшение: радуйся, славо и заступниче Русския земли: радуйся, сирым прибежище: радуйся, богомудре Феодоре: радуйся, жителю рая: радуйся, верным забрало: радуйся, доме и жилище Святыя Троицы, Юже моли о почитающих всечестную память твою.
Слава, и ныне, Богородичен:
О Тебе радуется, Благодатная, всякая тварь, Ангельский Собор и человеческий род, освященный Храме и Раю словесный, девственная Похвало, из Неяже Бог воплотися, и Младенец бысть, прежде век Сый Бог наш: ложесна бо Твоя Престол сотвори и чрево Твое пространнее Небес содела. О Тебе радуется, Благодатная, всякая тварь, слава Тебе.
Степенна, 1-й антифон 4-го гласа.
Прокимен, глас 4-й: Праведник, яко финикс, процветет,* и яко кедр, иже в Ливане, умножится. Стих: Возвеселится праведник о Господе и уповает на Него.
Евангелие от Иоанна, зачало 51:
По 50-м псалме стихира, глас 6.
Оружием твоих молитв,* праведне Феодоре,* охраняй и ныне Отечество наше** и людей православных от всяких бед и напастей.
Канон. Глас 1.
Песнь 1.
Ирмос: Поим Господеви песнь новую,* непроходимое бо оземленив чермное,* пешешествовати сотвори сыном Израилевым,* и сопротивныя враги покры море.
Просвети ми ум и озари моя чувства, согрешений мрак души моея отгнав, Христе Боже, да чистою совестию возмогу песнь составити и возвеличити Твоего угодника, праведнаго воина Феодора.
Архистратиже непобедимый Российския земли, якоже второе солнце, деяньми сияя, всех нас поминай, совершающих память твою, Феодоре многославне.
Воистинну в мори путие твои, победоносче Феодоре, и стези твоя безбожным агаряном на разорение в водах многих, и следы твоя, архистратиже земли Русския, врагом не познаются.
Богородичен: Законов кроме естественных, Дево, родила еси Законодавца Бога, Человека бывша. Того, яко Бога, моли, Всенепорочная, наша беззакония презрети.
Ин канон. Глас 1. Ирмос тойже.
Всесвятая Троице, Боже и Содетелю всего мира, поспеши и направи сердце, ум и уста наша достойно воспети велию славу добляго воина Твоего, благоверного адмирала флота Российского, Феодора Непобедимого.
Помянем, братия, како Божиею благодатию благоверный Феодор во граде Херсонстем душу свою за ближних своих полагает, и от смертоносныя болезни многих спасает, и любовь ко злым и благим делом являет.
Яко волны морския на нас воссташа беззакония наша, яко кораблец в пучине вси мы обуреваемся от прегрешений многих, но в тихое пристанище настави нас, Господи, покаянием и предстательством благоверного воина Феодора, и спаси нас.
Богородичен: Спаси нас, Мати Истины, обуреваемых люте от страстей и от сатрапов мысленных и часто погружаемых, и исправи и нас, Чистая, ко спасения благоутишному пристанищу.
Песнь 3.
Ирмос: Да утвердится сердце мое в воли Твоей, Христе Боже,* Иже над водами небо утверждей второе,* и основавый на водах землю, Всесилъне.
Предстояще Господу со Безплотными Силами, неизреченною славою блистающе, праведне Феодоре, за ны молися, творящия честную и преславную память твою.
Милование стяжал еси христоподражательное, раздавал еси богатство требующим, небесное богатство ходатайствующее тебе, еже и получил еси, Феодоре.
Ни молва мирская, ни чинов и наград вручение, ни слава тленная твоей яже по Бозе простоты уставиша, Феодоре, но благоволил еси воистинну божественным деянием.
Избавляеши обитель твою от лютых обстояний и чтущия тя от потопления в водах, яко предстатель верен и молитвенник изряден, Феодоре преславне.
Богородичен: Яко воистинну Господь воцарися в Царствие неотпадающее и облечеся псаломски из Тебе, Богомати, в красное благолепие, плоть святую, еюже смерть прият и разруши ея царство.
Ин канон. Ирмос тойже.
Да постыдятся и смятутся вси врази земли Русския, се бо Бог благоверного Феодора яко оружие Свое очищает и уготовляет, и яко фиал ярости Своея соделовает, и супротив агарян нечестивых направляет.
О воине Феодоре, Моисею подобяся, пса Магомета проповедников со всеми корабли в пучине морстей, яко войско древняго фараона иногда, потопляеши.
Воспрянем от сна уныния, братие, и помолимся ко благоверному воину Феодору Непобедимому, да испросит душам нашим от Господа мужество во бранех, долготерпение и велию милость.
Богородичен: Устави душ наших свирепые бури, Боже всех щедрый, мольбами рождшия Тя Богородицы, благоверного воина Феодора и всех святых Твоих.
Седален, глас 3.
Буди скорый в бедах утешитель, во бранех предстатель, во градех и странах вся люди неисчетною милостию покрывая, праведне Феодоре, молися Христу Богу о чтущих святую память твою.
Слава, и ныне, Богородичен:
Слове Божий, Иже рождейся от Девы Богоотроковицы, Тоя ходатайствы священными и праведнаго Феодора Твоего, Спасе, всякаго обстояния и всякия нужды избави душы наша.
Песнь 4.
Ирмос: Разумех, Всесильне,* Твое смотрение* и со страхом прославих Тя, Спасе.
Господи, услышахом дивная, яже сотворил еси велиим Феодором, и ужасохомся.
Восхваляем благость Твою, Господи, еюже исполнил праведнаго Феодора, разумеем, Всесильне, смотрение Твое и ублажаем Феодора предивнаго.
Твою поминаем, Боже, милость, юже явил еси в Феодоре человеколюбнем.
Богородичен: Кто изочтет силы Твоя, Чистая; но пощади нас, изми из глубины греховныя и настави на благое покаяние безвозвратно.
Ин канон. Ирмос тойже.
Помяни, диаволе, огнь, имже сожжена бысть Капудания, и глубину морскую, в нейже изгибе ополчение твое, и вострепещи, окаянный, езера огненнаго и жупельнаго, тебе уготованнаго на День Судный.
О султане юродивый, флота твоего несть ктому, се бо воин Феодор яко дух бурен не фарсийския, обаче магометанские корабли на Понте Евксинстем сокрушает и могущество нечестивых в ничто обращает.
О селения исмаилитска, о агаряне зломудреннии, восплачите и возрыдайте, и познайте суетство веры магометовы, и преклонитеся пред Сотворшим видимое и невидимое, и Сыном Его Иисус Христом, и Духом Его Святым.
Богородичен: Страстей волнение смущает нас и сластьми погружает, Дево Пренепорочная, кормчию Христа рождшая, руку нам помощи простри и спаси нас.
Песнь 5.
Ирмос: Яко просвещение наше сый, Христе,* просвети нас, Защитителю жизни нашея* сохрани ны, надеющияся на Тя.
Просвети твое житие всю вселенную, святе Феодоре, правоверными делы сияющее, яко солнце, Триличнаго Божества зарею просвещаемь.
Иже на мори быв флотоводец искусен и непреборимь, испрос наследию твоему мужество и веру непоколебиму, отгоняя присно врагов шатания.
Завистию и злобою одержими лжесоюзницы, козни деяху тебе, ты же из глубины сердца вопиял еси: сохрани мя, надеющагося на Тя.
В жизни временней никаяже рана коснуся телеси твоему, обаче по преставлении поругание многое от злых человек потерпеша честныя мощи твоя, умножающе тебе, Феодоре, славу на Небесех.
Богородичен: Воспойте, вся земли, пойте же Возсиявшему из чрева боголепно неискусобрачныя и Сию верным показавшему тверду надежду и похвалу.
Ин канон. Ирмос тойже.
О, како неложный Боже, на островех Керкирских оружием благоволения венчаеши добляго Феодора, да низложит безбожие галльское, да не пребудут беззаконницы пред очима Твоима во веки!
Положу на мори руку Его и на реках десницу Его: се бо, Господи Иисусе Христе, от лица верного раба Твоего, благоверного воина Феодора, изсекаеши вся враги его и ненавидящие его во Адриатстей пучине потопляеши.
Господи, днесь на западе солнца врази Твои паки возшумеша и ненавидящии Тя паки воздвигоша главу, на люди Твоя лукавноваша, на Тя завет с диаволом завещаша.
Богородичен: Пречистая Владычице, рождшая человеком кормчию Господа, страстей наших непостоянное и лютое утоли смущение и тишину подаждь сердцам нашим.
Песнь 6.
Ирмос: Обыде нас последняя бездна,* несть избавляяй,* вменихомся яко овцы заколения.* Спаси люди Твоя, Боже наш:* Ты бо крепость немощствующих и исправление.
Православную страну Российскую благомилосердо пощади, и милостивно утверди, Боже наш, и мир, и любовь, и здравие со всеми сотвори, Феодора молитвенника имея ходатая о нас.
Укроти, воеводо святый Феодоре, находы злотворных человек и из рук их исхити, гонящих и расхищающих немилостивно.
Молитвами предваряя к Богу и Тому предстоя Со Ангелы, за весь мир молися, брань неприязненную всю потребити и победу известну дати на сопостаты воинству нашему.
Богородичен: На Небеси Архангели и Ангели, Херувими и Серафими славят, на земли же вси людие раболепно покланяются Рождеству Твоему, сего ради молим Тя, Владычице: спаси души наша.
Ин канон. Ирмос тойже.
Господи Иисусе, верный раб Твой адмирал Феодор Непобедимый помощию Твоею вся оплоты галльския разоряет, и вся твердая их в страх и поношение окрестным языком полагает, и безбожие их в конец уничтожает.
Радуйся, нищих и сирых питателю и покровителю, радуйся, вдов защитниче, радуйся, юности наставниче, болящих утешение, плененных отрадо и нам всем молитвенниче предивный!
О воине Феодоре! Услыши ны, во истине тя призывающыя, и прииди от горних селений к нам, во гресех утопающым, якоже Христос сквозе ветр дыхающ и мраз и тьму нощную ко учеником Своим, и помози нам.
Богородичен: Яже от источник источившая воду оставления, Пренепорочная, сердца наша напой, изсохшая всякими преступленьми.
Кондак, глас 2.
Архистратиже Российский,* служителю народа Божияго,* нищих и угнетенных свободителю*, нечестивых наказателю,* полезнаго нам проси и велия милости,* яко споборник наш, праведне Феодоре.
Икос:
Всечестную память почтим угодника Христова, великаго Феодора, храбраго воина на сопостаты и кормчаго благоутишна, радостными глаголы от сердца воззовем к нему, сице вопиюще:
Радуйся, дела благая со тщанием творивый;
радуйся, управителю мудрый и терпеливый.
Радуйся, врачу усердный и милостивый;
радуйся, молитвенниче теплый и неутомимый.
Радуйся, воеводо праведный и непобедимый;
радуйся, рабе Божий, кроткий и человеколюбивый.
Радуйся, враги злочестивыя смиряяй и устрашаяй;
радуйся, и ныне со Ангелы и всеми святыми за ны моляйся.
Радуйся, воине Феодоре, архистратиже державы Российския.
Песнь 7.
Ирмос: По множеству милости Твоея,* Человеколюбче, сотвори с нами,* да Тебе верно вси, воспевающе, поим,* якоже отроцы:* благословен еси, Боже отец наших.
Велия подвиги совершил еси, несумненную веру имея, споспешествуемый молитвами сродника твоего, преподобнаго Феодора, взывающаго: благословен еси, Боже отец наших.
Кротостию и простотою душевною к себе привлекая, и царицу сим удивил еси, и дары от нея почтен, взывал еси: благословен еси, Боже отец наших.
Скорбьми утесняемь отовсюду, терпел еси вся, и на Человеколюбца надежду возложив, вопиял еси: благословен еси, Боже отец наших.
Богородичен: Надеждо всем, Госпоже Богородице, разгони, Владычице, враги души моея и направи на стезю праву. Пощади, Помощнице и Надеждо христианская, Сыну Своему зовущи: благословен еси, Боже отец наших.
Ин канон. Ирмос тойже.
О, чудесе! Якоже древле Давид пред сенным ковчегом, тако и ты, воине Феодоре, пред мощми дивнаго во святых святителя Спиридона Тримифунтскаго главу свою преклоняеши и крестным ходом истинное правоверие на Керкире паки утверждаеши.
О камение и горы, падите на мя и покрыйте мя, рече ересиарх латинский, услышав слух о воех твоих, о Феодоре, в Рим ветхий входящих и супротив галлов зловредных, якоже Гедеон супротив Амалика иногда, храбро ополчающихся.
Кто возможет сказати о милосердии твоем, о благоверный воине Феодоре; блажен еси, разумеваяй на нища и убога, воистину в день лют избави и сохрани тя Господь.
Богородичен: Вод источник молитвенный Тя, Богородительницу, ведуще вси, источающ верным струи душам и телесем, темже Тя непрестанно славим.
Песнь 8.
Ирмос: Песнь Тебе приносим безплотных, * якоже отроцы в пещи,* и, поюще, глаголем:* благословите, вся дела Господня, Господа.
Пищи безсмертныя, Тела и Крови Христовы, сподобился еси причаститися, Богомудре, душу твою Небесному Царю и Владыце предал еси, взывая: благословите, вся дела Господня, Господа.
Украшен мудростию и разумом просвещен, смирением сердца лепотствуя, к мысленным прешел еси двором, идеже воспеваеши: благословите, вся дела Господня, Господа.
Тобою, праведне Феодоре, земля Темниковская вельми хвалится: в ней бо последния дни благочестно пожив, спасение соделав, Бога Всещедраго и Милостиваго чтити научил еси, зовый: благословите, вся дела Господня, Господа.
Богородичен: Егоже родила еси, Владычице, присно моли работы избавити мя страстей и осуждения, и одержащаго мя лютаго отчаяния, и оскорбляющих мя удержания, Чистая Богорадованная.
Ин канон. Ирмос тойже.
Под конец жизни твоей во окрестностех обители Санаксарския водворяешися, зде, речеши, покой мой, зде тихое пристанище, зде вселюся во век века.
Течение твое скончал еси, веру соблюл еси, сего ради Бог жизнь твою близ мощей преподобнаго Феодора Санаксарского, сродника твоего, скончавает и сосуд тя избранный ко Царству Небесному приуготовляет.
Ущедрил еси Твое создание, Владыко, очистил еси Твоим благоутробием, души его вожделенное Отечество даровал еси, тело же многотрудное в Санаксарских стенах упокоил еси.
Богородичен: Водами животочными, Дево, напой истаявшие душы наша зноем греховным, яко да класы плодоносны возрастим, Чистая, Божественнаго умиления.
Песнь 9.
Ирмос: Радуйся, Пресвятая Богоприемная Марие,* радуйся, Пречистая, падших основание:* в Тебе бо явися днесь Владыка,* о, чудесе! обновляяй истлевшыя* и к свету возводя невечернему, Отроковице.
День празднственный и пользы ходатайственный честный твой совершаем: ты бо Господень угодник и Того заповедей делатель явился еси неослабен, досточудне Феодоре.
Зарею трисолнечныя благодати сияя, светле твой праздник творящих озари и страстнаго омрачения демонскаго избави, Феодоре преславне.
Святителие и монаси, священницы и простии, воини и людие, светло предъиграйте и память святаго сына России в песнех возвеличайте.
Богородичен: Света приятелище утроба Твоя бысть, просвещающаго мир, Богорадованная. Темже молим Тя: светлу зарю подаждь нам, Богоневесто, мольбами Феодора доблемудраго.
Ин канон. Ирмос тойже.
О воине Феодоре! Ты днесь Престолу Божию предстоиши, и славу Его откровенным лицем созерцаеши, и тайны сокровенныя и страшныя Дня Суднаго разумеваеши.
О воине Феодоре! Помози нам молитвами своими и укрепи на брань супротив зверя, из моря исходяща, силу змия древняго имуща и престол сатаны содержаща и область велию, да не поклонимся ему, ниже послужим.
Не отчаивайтеся, рекл еси, о Феодоре: сия бури грозныя обратятся ко славе России. И ныне помози стране и людем нашим предстательством всемощным, да вера и любовь ко Отечеству восторжествуют, да возсияет слава новая боголюбезнаго царства русскаго.
Богородичен: Приими, Владычице, моления Твоих раб и Сына Твоего умоли, с праведным Феодором, подати нам грехов прощение.
Светилен:
Слышана бысть во всех странах превеликая слава твоя, и тогда жены агарянския страшаху чада своя грозным твоим именем. И ныне, праведне, враги наша невидимо устрашай, ополчающихся на христолюбивое твое воинство.
Слава, и ныне, Богородичен:
Приими, Пресвятая Богородице, молитвы угодника Твоего, праведнаго Феодора, вкупе и наша, и избави, Владычице, от ухищрений злобнаго врага стадо Твое.
На хвалитех стихиры, глас 4.
Подобен: Дал еси знамение:
Дал еси, Христе Боже, Российстей земли* заступника преславна, Феодора праведнаго,* всем в бедах скорого помощника,* вдов и сирот заступника,* пленных свободителя,* и нищих питателя,* и люди своя от всяких бед избавляющаго,* егоже молитвами даруй градом и обителем нашим утверждение** и людем Твоим велию милость.
Дал еси, Христе Боже,* православней стране Российстей* крепкаго защитника, Феодора непобедимаго,* вождем похвалу и утверждение,* врагов преславнаго победителя,* Отечество свое неотступно храняща,* егоже молитвами* даруй на враги победу** и людем Твоим низпосли велию милость.
Дал еси, Христе Боже,* всем православным людем Твоим, утешителя премилосердаго,* всехвальнаго Феодора,* скорбным всем предстателя,* болящим врача предивнаго,* крепкое целомудрия забрало,* отчаянным непостыдную надежду,* егоже молитвами вся вражия разруши шатания** и людем Твоим даруй велию милость.
Слава, глас 8, самогласен:
Приидите, Российстии вси православнии людие,* богатии и убозии,* честным мощем дивнаго Феодора поклонимся,* той нас избавит от рук неверных язык и злотворных человек,** и из рук ненавидящих нас молитвами его свободимся.
И ныне, Богородичен, глас тойже: Владычице, приими:
На литургии, блаженна святаго, 1-го канона песнь 3-я на 4: и 2-го, песнь 6-я на 4.
Прокимен, глас 4: Да воскреснет Бог,* и расточатся врази Его. Стих: Яко исчезает дым, да исчезнут.
Апостол к Ефесеем, зачало 220:
Аллилуиа, глас 4: Господь крепок и силен, Господь силен в брани: Стих: Праведник яко финикс процветет:
Евангелие Луки, зачало 24: Причастен: В память вечную:
Молитва
святому праведному воину Феодору
О преславный защитниче земли Русския и веры православныя усердный поборниче, непобедиме воине Феодоре! Никая благодарственная словеса, ниже изящная витийства довлеют, во еже прославити праведное и дивное твое житие, понеже из млада крепкую веру во Христе и любовь ко Отечеству стяжав, благоплодное прозябение честных родителей явился еси. Сего бо ради, Божию дару тезоименит, стране своей в скорбныя времена браней против иноплеменных показался еси. Ибо, праведным воеводам подражая, не числом и уменим токмо, но паче верою враги побеждал еси, силу благочестия истиннаго показуя. Темже любовию к тебе распаляеми, воспеваем многия добродетели твоя: велию любовь ко Господу и ближним, зане тех ради живот полагал еси, чистоту ангелоподобную, яко вся воздержанием удивил еси, нестяжание истинное, ибо благая и красная мира сего презрел еси. Ей, преблаженне Феодоре, угодниче Божий и благоверный болярине царей православных, призри на убогое моление наше, из греховнаго плена к тебе возносимое. Приклони на милость Господа нашего Иисуса Христа, да не воздаст по делом нашим, но обаче дарует грехов оставление, избавит от злых, находящих на ны, и подаст властем нашем и народу усердное попечение, воинству мужество во ратех, народу благочестие трезвенное. И сподобит нас достигнути безмятежнаго пристанища во Царствии Небеснем, идеже со всеми святыми прославляти будем всесвятое имя Отца и Сына и Святаго Духа во веки веков. Аминь.
Молитва иная:
Приникни, праведне воине Феодоре, с горних селений на притекающих к тебе и вонми молнию их: умоли Господа Бога даровати всем нам еже ко спасению нашему мы просим от Него, при святем твоем предстательстве. Ты великое, возложенное на тя служение тщательно проходил еси, и нас твоею помощию пребывати коегождо, в неже призван есть, настави. Ты, победив супостатов множества, и на нас ополчающихся всех видимых и невидимых врагов низложи. Умоли Господа Бога даровати крепкий и ненарушимый мир и земли плодоносие, пастырем святыню, законам правду и силу военачальникам мудрость и доблесть непобедимую, градоначальникам суд, флоту твоему Российскому и всему воинству нашему преданность вере и Отечеству и неодолимое мужество, всем же православным христианам здравие и благочестие. Сохраняй страну нашу Российскую и обитель сию святую от всех наветов вражиих, да словом и делом прославляется в них всесвятое имя Отца, и Сына, и Святаго Духа, ныне, и присно, и во веки веков. Аминь.
АКАФИСТ
святому праведному воину Феодору,
Адмиралу флота Российскаго, непобедимому
Кондакъ 1
Избранному воину земли Российския, дивному украшению Отечества нашего, Святому праведному воину Феодору, Адмиралу флота Российскаго, похвальное пение восписуем, аки верою Христовою врази победи, милосердием, братолюбием и смирением жизнь свою украси.
Радуйся, Святый праведный воине Феодоре, Адмирале флота Российскаго, непобедимый!
Икосъ1
Со Архангелом Михаилом, воином небесным, Богу предстоиши и молитвы возносиши за воинство и Отечество наше. Корабль души своея, флотоводче, в Царство Небесное привел еси, воинству морскому веру и непоколебимость в бранех вселил еси.
Радуйся, земли Российския украшение,
радуйся, измлада Богом избранный,
радуйся, мужества похвало,
радуйся, от юности любовию к Отечеству исполнивыйся,
радуйся, военачальником удивление,
радуйся на истиннаго Бога упование и надежду всецело возложивый,
радуйся, Святый праведный воине Феодоре, Адмирале флота Российскаго, непобедимый!
Кондак 2
Удивляше родителя своя смирением отроческим, и приятием законов православных, и та, взирающа на тя, славяста всемилостиваго Бога , мы же, слышавше подвизи твои, поем Господеви, прославившему тя: Аллилуиа.
Икос 2
Восприял еси, праведный воине Феодоре, величие победы в духовной брани сродника твоего, преподобнаго Феодора Санаксарскаго, вооружился еси и в ратных подвизех верою Евангельскою, служа Отечеству и Христу, тем же вопием ти:
Радуйся, Российскаго воинства морскаго прославление,
радуйся, чина офицерскаго освящение,
радуйся, веру православную в воинстве нашем укоренивый,
радуйся, чистоту и целомудрие стяжавый,
радуйся, покровителема небесныма, воинома великомученикома Феодору Тирону и Феодору Стратилату подражавый,
радуйся, стоянием в Дусе Святем духовную и ратную брань преодолевый,
радуйся, Святый праведный воине Феодоре, Адмирале флота Российскаго, непобедимый!
Кондак 3
Силою Божественныя благодати сиял еси, праведный воине, юным офицером терпя на Балтийстем флоте труды и бури службы морския; ныне и мы уповаем на молитвы твои, аки стяжал еси мужество, веру и надеяние на Господа нашего, и мы взываем прославившему тя Христу: Аллилуиа.
Икос 3
Имеяй милосердие к людем града Херсона, явился еси им утешением, спасаяй от чумной болезни тяжко страждущих; труды и делы своими прекращал еси недузи страдания, возносяй молитвы к Богу добродеющему.
Радуйся, благочестивый воине, милосердный к страждающим,
радуйся, надеяние немощным и слабым,
радуйся, истинной молитвы дивный подвижниче,
радуйся, страстей телесных непреоборимый противоборче,
радуйся, неиждеваемой мудростию христианской украсивыйся,
радуйся, непреложным исполнением заповедей Божиих силу их и благодать показавый,
радуйся, Святый праведный воине Феодоре, Адмирале флота Российскаго, непобедимый!
Кондак 4
Крест Христов приял еси, промыслительно данный тебе, достославне Адмирале, за ревностную службу в славном граде Севастополе, имже даровал еси воинству морскому истинный образ подражания чести и преданности долгу; темже и мы благодарим Бога, изливающаго благодать на избранных своих, верно воспоем Ему: Аллилуиа.
Икос 4
В тяжкая времена для Отечества нашего, воине благословенный, верой и смирением подъял еси труды, посланные Богом, исполнил достойно еси присягу, данную Государыне твоей, воздвигаяй Черноморскую рать, ободряяй ю словесы: Сии грознии бури обратятся во славу России. Мы же, удивляяся вере твоей, возносим Господу Богу благодарения сия:
радуйся, немощи человеческия носивый,
радуйся, осрамивый человекоугодие, тщеславие и гордыню,
радуйся, усердный любителю добродетелей духовных,
радуйся, предстателю нуждающихся в помощи,
радуйся, истинный искателю пристани Царствия небеснаго,
радуйся, отрешившийся злата и прелести мира сего,
радуйся, неистощимое богатство веры Христовой стяжавый,
радуйся, Святый праведный воине Феодоре, Адмирале флота Российскаго, непобедимый!
Кондак 5
Возвеличен Андреевский флаг на Черном море, показуя веру Христову матросов православных; ты же, святый воине Феодоре, водительством своим возвещал еси воинству силу веры Христовой. Мы же, дивящеся вере твоей и дивным трудом, воспеваем Богу: Аллилуиа.
Икос 5
Видев превосходящую сил флота агарянскаго, не усомнился еси в победе воинства православнаго, явился еси в бранех главным созидателем славы земли Российския. Победил еси богомерзкия, великий флотоводче, упованием на Христа, силою веры и мужеством, аки Давид Голиафа.
Радуйся, земли Саранския благословенное украшение,
радуйся, добропобедный пробавителю славы князей русской дружины,
радуйся, усердно прибегаяй к помощи Божией,
радуйся, землю нашу и веру от нашествия иноверцев сохранивый,
радуйся, словеса благовернаго князя Александра Невскаго: Не в силе Бог, но в правде, утвердивый,
радуйся, славу Отечества всему миру возвестивый,
радуйся врагов наших трепетание и восхищение,
радуйся столпе веры православной и утверждение,
радуйся, древо, благодатию Божией исполненное,
радуйся, Святый праведный воине Феодоре, Адмирале флота Российскаго, непобедимый!
Кондак 6
Вознесеся слава о защитнице своем среди людий, радующихся о великом флотоводце нашем, иже хранил и приводил еси народ к Спасителю, пристанищу нашему; к нему же и мы притецем, радостно зовуще: Аллилуиа.
Икос 6
Возсияша вера истиннага, низведшага благодать на Черноморское воинство чрез храбраго сына Российскаго. Ты же, святый праведный воине Феодоре, приступал еси к брани с неверными, взяв оружием веру православную и предстательство сонма святых, темже славу Отечеству принесл еси нетленную.
Радуйся, истинно уповаяй на Державнаго Господа,
радуйся, новое светило Церкви православной,
радуйся, мудрый в трудностех и смелый в бранех,
радуйся, образ любви к Всемогущему Богу явивый,
радуйся, праведное зерцало телесной и духовной чистоты,
радуйся, Промыслу Божию живот свой всецело предавый,
радуйся, Отечество свое от неистовых враг сохранивый,
радуйся, неиждиваемую любовь Христову ближним и дальним своим явивый,
радуйся, Святый праведный воине Феодоре, Адмирале флота Российскаго, непобедимый!
Кондак 7
Славу человеческую презревый, досточудный воине Феодоре, Богом прославленный победами мнозими, во смирении похвалу от соотечественник приявый, даждь и нам смирение и кротость в тщеславном мире нашем, и мы возславим Господа о тебе и вознесем ангельскую песнь: Аллилуиа.
Икос 7
Умножися слава твоя новыми подвизи, великий флотоводче, яки сокрушал еси множество вражеских кораблей на Черном море и, моляся добротворному Богу, сохранял еси жизнь людем, сражавшимся под рукою твоею, подавая им образ мужества и в нуждах помощь.
Радуйся, славу нищих духом снискавый,
радуйся, милость и попечение о людех явивый,
радуйся, смиренномудрием в великих деяниех твоих просиявый,
радуйся, благодатиею Божией демонские наветы побеждавый,
радуйся, дивно отрешивыйся мира суетнаго и грешнаго,
радуйся, талант, данный Богом, явивый и преумноживый,
радуйся, красото праведников, избранных свыше,
радуйся, Святый праведный воине Феодоре, Адмирале флота Российскаго, непобедимый!
Кондак 8
Воле Божией всего себя предавый, во опасностех мир и душевную тишину хранивый, видя Десницу Божию над деянии твоими, мы же, богомудрию твоему дивящеся, вопием к Богу: Аллилуиа.
Икос 8
Великий и дивный подвиг свершил еси помощию Божиею, праведный воине Феодоре, победивый агарян при Калиакрии, егда злонравный султан, противляяйся силе и славе твоей, призва знатнаго военачальника своего, ты же обратил еси врага в бегство неудержимое и смятение многосуетное, не ведающаго крепость твою и правду Божию.
Радуйся, добрый защитниче слабым,
радуйся, неиссякаемый любви христианской источниче,
радуйся, моливыйся за воинов своих и не имевый среди них плененных,
радуйся, подражателю святым в одолении духовных страстей и немощей плотских,
радуйся, на святаго Ангела Хранителя своего, неустанно призываемаго, уповавший,
радуйся, к Пресвятой Богородице в усердной молитве притекавший,
радуйся, Господа нашего Иисуса Христа всем сердцем возлюбивый,
радуйся, Святый праведный воине Феодоре, Адмирале флота Российскаго, непобедимый!
Кондак 9
Мирным временем, славный флотоводче предавался еси святой молитве , внимаяй радостно и умиленно псалмопение, тем же вручил еси воином своим и матросом главное оружие на врага веру православную; да и с ними дерзаем воспевати: Аллилуиа.
Икос 9
Видяй свой великий долг в созидательных трудех, кроме воинстих, достославный Адмирале флота Российскаго, благоукрашал еси град Севастополь восстановлением ветхаго храма святители Николая Архиепископа Мирликийскаго Чудотворца, покровителя в морех плавающим, разумем чудную силу предстательства его за Черноморское воинство.
Радуйся, душу свою православием питавый,
радуйся, укрепляемый таинством Евхаристии Тела и Крови Христовой,
радуйся, уповавый на единаго Христа, Спасителя нашего, но не на власть предержащих и князей человечестих,
радуйся, чин воинстий многими подвиги обретший,
радуйся, Отечества нашего неустанный защитниче и похвало,
радуйся, бранные труды и опасности ради Веры и Отечества возлюбивый,
радуйся, не убоявшийся смерти телесныя, ниже гибели духовныя,
радуйся, Святый праведный воине Феодоре, Адмирале флота Российскаго, непобедимый!
Кондак 10
Возвысив имя твое, Всемогущий Господь дароваше ти великие победы в Средиземном море, возлагая на тя спасение и освобождение народив мнозих, злочестивыми агаряны порабощенных. И ты помощию Божиею подъял еси доблестные ратные труды, являя мудрое дерзание и храброе деяние. Со упованием к помощи твоей ныне притекая, восхваляем Господа: Аллилуиа.
Икос 10
Стену неприступную показаше остров Корфу, обаче ты, праведный и непобедимый флотоводче, на флагманском корабле, нареченном именем святаго Апостола Павла, вел еси воинов своих к победе, прославляя Отца Небеснаго и уповая на помощь Его.
Радуйся, веры православныя неустанный хранителю,
радуйся, славы Российския украшение,
радуйся, воином своим добрый наставниче,
радуйся, жизнь свою Отечеству посвятивый,
радуйся, тяготы ближних носивый,
радуйся, верности и долгу научивый,
радуйся, образ доблести воином показавый,
радуйся, славы флота Российскаго благий устроителю,
радуйся, Святый праведный воине Феодоре, Адмирале флота Российскаго, непобедимый!
Кондак 11
Пения великия возносят ти, воине Феодоре, греки православныя, памятуя помощь твою предком своим порабощенным, и славят тя, яки дивнаго помощника и брата во Христе, посланнаго по молитвам их, во еже защитити и утвердити православие. С Господом пребывая, молись за ны, поющим тебе: Аллилуиа.
Икос 11
Возсия благодать в первый день Святыя Пасхи, егда ты, великий Адмирале, выносом Святых мощей дивнаго угодника Божия Спиридона Тримифунтскаго воспрослави Святаго сего крестным шествием с войском своим, являя веру воинства Российскаго.
Радуйся, добропобедный освободителю порабощенных,
радуйся, мощи святителя Спиридона Тримифунтскаго торжественно прославивый,
радуйся, в жизненнных обстояниех образ стойкости и мужества показавый,
радуйся, разумевший о себе Промысел Божий,
радуйся, благодарным сердцем к Господу сиявший,
радуйся, по морю плавающим мощный заступниче и верный от бед хранителю,
радуйся, Святый праведный воине Феодоре, Адмирале флота Российскаго, непобедимый!
Кондак 12
Отходяй ратных дел и памятуяй смертный час, святый час, святый воине Феодоре, предался еси усердной молитве к Богу, обретая духовное пристанище в Санаксарской Обители, благодарение вознося за помощь и предстательство сроднику своему преподобному Феодору Санаксарскому. Славил еси Бога, праведниче, украшал обитель многими и благими дары. Взывающе благодарным сердцем ко Господу, возносим молитвы к Нему: Аллилуиа.
Икос 12
Отечество не оставил еси по успении своем, праведный флотоводче, и явился еси дивно в святости, покрывая землю нашу предстоянием пред Господом. Ты подал еси образ мужества и веры Христовой воином нашим, приявшим дивные подвизи твои и упование на Бога в сердца своя.
Радуйся, вдохновивый матросов корабля Варяг пленению смерть во славу Отечества предпочтити,
радуйся, научивый российских моряков молитвой ко Христу труды воинские и тяготы морскии носити,
радуйся, яки многомилостивый Господь оградише та от горечи поражений,
радуйся, райских обителей достойный наследниче,
радуйся, праведно поживший и праведно отшедший к Богу,
радуйся, светило святости и добрых дел во славу Отечества и Церкви православной,
радуйся, Святый праведный воине Феодоре, Адмирале флота Российскаго, непобедимый!
Кондак 13
О великий и преславный флотоводче Феодоре, призри на ны грешных, возносящих тебе усердное пение сие молитвами нашими, и испроси нам у Господа дарованные тебе праведность и стойкость в трудах воинских и мирских, в скорбех нестроений века сего и тлетворных расколов, объедини землю Российскую верой во Христа, любовию к Богу и Отечеству, да с тобой воспоем Богу: Аллилуиа. (Этот кондак читается трижды, а затем Икос 1 и Кондак 1).
Тропарь
Возвеличивый житие твое молитвой и благочестием, святый мудрый и благий воине Феодоре, защитниче земли Российския, истинный хранителю веры православной, моли Христа Бога даровати нам, православным, путь ко спасению и велию милость.
Кондак
Якоже праведное светило возсиял еси, великий воине Феодоре, душу свою положивый за веру православную и землю Русскую. Подражателю кротости и поборниче мужества, пребыл еси непоколебимым проповедником веры, досточудными делы праведности сияяй, темже ныне честную память твою возносим дивно прославившему Тя Господу, да вси вернии вопием ти: радуйся, Святый праведный воине Феодоре, Адмирале флота Российскаго, непобедимый!
Молитва
Услыши в райских обителех, праведный воине Феодоре, молитвы притекающих к тебе, яки пребыл еси помощник дивный и при жизни своей. Ты осветил еси, праведниче, жизнь мира сего светом души твоея, милосердием истинным, заступничеством скорым и благим, исполнением заповедей Божиих. Ты явил еси, дивный защитниче Отечества Российскаго, образ кротости благодатной, мужества непоколебимаго и любви велией к вере православной. Буди и ныне заступник народу своему, покрый нас кровом предстательства твоего пред Всевышним и огради нас от нашествия иноплеменных и иноверных, укрепляя чистотою и смирением, нетленной верой во Христа, даруя победу на врага рода человеческаго. Добропобедный вождю, ниспосли доблесть воинству нашему, властем мудрость и правду, всем нам, православным христианом, чистую веру во Христа Бога нашего. Аминь.
Составил протоиерей Александр Бай, настоятель храма святого праведного воина Феодора Ушакова г.Севастополя.